សម្ដេចក្រឡាហោម ស ខេង អញ្ជើញចុះសួរសុខទុក្ខប្រជាពលរដ្ឋ ពិនិត្យមើលស្ថានភាពធ្វើស្រែចំការ និងកិច្ចអន្តរាគមន៍បូមទឹកសង្គ្រោះស្រូវ
07-March-2019 | ដោយ ពលមនសិការ
ព្រៃវែង៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចុះសួរសុខទុក្ខប្រជាពលរដ្ឋ ពិនិត្យមើលស្ថានភាពធ្វើស្រែចំការ និងកិច្ចអន្តរាគមន៍បូមទឹកសង្គ្រោះស្រូវកសិករ និងដំណើរការអភិវឌ្ឍមូលដ្ឋានតាមបណ្ដាក្រុងស្រុកមួយចំនួនក្នុងខេត្តព្រៃវែង កាលពីថ្ងៃពុធ ១កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៦ ខែមីនា ឆ្នាំ២០១៩។
ក្នុងឱកាសក្នុងដំណើរអញ្ជើញចុះមូលដ្ឋានប្រជាពលរដ្ឋរបស់សម្ដេចឧបនាយករដ្ឋមន្ត្រី មានការអញ្ជើញចូលរួមពីសំណាក់ឯកឧត្តម លោកជំទាវ ជាប្រធានក្រុមប្រឹក្សាខេត្ត អភិបាល អភិបាលរងខេត្ត ប្រធានមន្ទីរ និងអង្គភាពពាក់ព័ន្ធចំណុះឱ្យរដ្ឋបាលខេត្តព្រៃវែង ជាច្រើនរូប។
សម្ដេចក្រឡាហោម ស ខេង បានអញ្ជើញឆ្លៀតចូលសួរសុខទុក្ខប្រជាពលរដ្ឋរងគ្រោះ ដោយសារការពុលនំបញ្ចុកចំនួន៧២នាក់ ស្ថិតនៅភូមិថ្កោល ឃុំបឹងដោល ស្រុកព្រះស្តេច ខេត្តព្រៃវែង ដែលពួកគាត់ កំពុងសម្រាកព្យាបាលសុខភាព នៅមន្ទីរពេទ្យបង្អែកស្រុកព្រះស្តេច។
បន្ទាប់ពីបានអញ្ជើញសួរសុខទុកប្រជាពលរដ្ឋរួចហើយសម្ដេចក្រឡាហោម ស ខេង បានបន្តអញ្ជើញចុះត្រួតពិនិត្យការដ្ឋានសាងសង់ប្រព័ន្ធប្រឡាយបូព៌ា ដែលស្ថិតក្នុងស្រុកព្រះស្ដេច។ ប្រឡាយបូព៌ានេះ មានទទឹងមាត់លើ១៣ម្រ៉ែត និងបណ្តោយរហូតដល់ជាង២៥,០០០ម៉ែត្រ។
នាឱកាសនោះដែរ សម្ដេចឧបនាយករដ្ឋមន្ត្រី បានបន្តចុះសួរសុខទុក្ខប្រជាកសិករនៅតាមបណ្ដាឃុំនៃស្រុកព្រះស្ដេចចំនួន៧ឃុំ គឺឃុំល្វា, ឃុំជៃកំពក, ឃុំអង្គរាជ្យ, ឃុំសេនារាជឧត្តម, ឃុំបន្ទាយចក្រី, ឃុំក្រាំស្វាយ និងឃុំរំចេក។ ប្រជាកសិករក្មេងចាស់ស្រីប្រុសបានទទួលស្វាគមន៍សម្ដេចប្រកបដោយភាពរាក់ទាក់ និងគោរពស្រលាញ់។
ក្នុងដំណើរសួរសុខទុក្ខពលរដ្ឋប្រកបដោយភាពរីករាយ និងស្និតស្នាលនោះ សម្ដេច ក្រឡាហោម ស ខេង បានអញ្ជើញទៅដល់ស្ថានីយបូមទឹក ដែលដំណើរការដោយចរន្តអគ្គិសនី ហើយមានវិសាលភាពបូមទឹកស្រោចស្រពផ្ទៃដី ស្រែកសិករជាង៧២៤០ហិតា ក្នុង៧ឃុំ ស្មើនឹង៤២ភូមិ។
ដំណើរចុះទៅកាន់មូលដ្ឋានប្រជាពលរដ្ឋរបស់សម្ដេចក្រឡាហោម ស ខេង ពេញមួយព្រឹកថ្ងៃទី៦ ខែមីនាបានបញ្ចប់នៅពេលសម្ដេច រួមទាំងថ្នាក់ដឹកនាំខេត្ត បានបន្តអញ្ជើញទៅពិនិត្យស្ថានីយបូមទឹកមួយកន្លែងទៀត គឺស្ថានីយបូមទឹកបញ្ចូលក្នុងប្រឡាយខ្សេរ និងអញ្ជើញសួរសុខទុក្ខប្រជាពលរដ្ឋរស់នៅឃុំធាយ នៃស្រុកបាភ្នំ។
បន្ទាប់មក គឺនៅរសៀលថ្ងៃដដែលនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបន្តអញ្ជើញពិនិត្យការដ្ឋានសាងសង់អគារដ្ឋបាលសាលាខេត្តព្រៃវែង ដែលស្ថិតនៅក្នុងក្រុងព្រៃវែង។
ចេញដំណើរពីក្រុងព្រៃវែង សម្ដេចបានបន្តអញ្ជើញទៅពិនិត្យការដ្ឋានសាងសង់ផ្លូវក្រាលកៅស៊ូតភ្ជាប់ពីឃុំមេសរប្រចាន់ ទៅកាន់ឃុំកំពង់ពពិល ស្រុកពារាំង និងមើលការសាងសង់ស្ពាន ពីឃុំមេសរប្រចាន់ ស្រុកពារាំង ខេត្តព្រៃវែង តភ្ជាប់ទៅឃុំស៊ីធរ ស្រុកខ្សាច់កណ្តាល ខេត្តកណ្តាល មានប្រវែង ៧២ម៉ែត្រ ទទឹង៥ម៉ែត្រ។
នាឱកាសនោះដែរ សម្តេច ក៏បានអញ្ជើញទៅពិនិត្យមើលការបូមទឹកសង្គ្រោះស្រូវប្រាំងចំនួន៣១១ហិតា ជូនពលរដ្ឋជាប្រជាកសិករនៅចំណុចបឹងទ្រាំង ភូមិមេសរប្រចាន់ ឃុំមេសរប្រចាន់ ស្រុកពារាំង ដែលមានម៉ាស៊ីនអន្តរាគមន៍កំពុងដំណើរចំនួន២គ្រឿង ។
ជាចុងបញ្ចប់នៃដំណើរចុះមូលដ្ឋាននេះ សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានថ្លែងអំណរគុណ និងជូនពរដល់ ឯកឧត្តម ប្រធានក្រុមប្រឹក្សាខេត្ត អភិបាលរងខេត្ត មន្ទីរអង្គភាពជុំវិញខេត្ត រដ្ឋបាលខេត្តព្រៃវែង ព្រមទាំងសហការី ទាំងអស់ សូមមានសុខភាពល្អ និងជ័យជំនះគ្រប់ភារកិច្ច ៕
ចំនួនអ្នកទស្សនា
- ថ្ងៃនេះ11241
- ម្សិលមិញ6261
- សប្តាហ៍នេះ29621
- ខែនេះ144771
- ឆ្នាំនេះ144771
- សរុប20587227